BERAKO MENDI ITZULIA MAIATZAREN 21EAN EGINGO DA
Bi ibilbide egongo dira, 22 eta 26 kilometrokoak, eta Larunera igotzea aukerakoa izango da.
Datorren igandean, maiatzaren 21ean, Agerra Mendi Taldeak Berako Mendi Itzuliaren hamabosgarren edizioa antolatuko du, 22 eta 26 kilometroko bi ibilbide izango dituen mendi-ibilaldia. 26 kilometroko ibilbidea, 1.600 metroko desnibelarekin, Larunetik pasako da; 22 kilometrokoak, berriz, 1.200 metroko desnibela izango du eta leunagoa da.
Izen-ematea aldez aurretik egin daiteke inscripciones.nafarmendi.org webgunean, edo egun berean, 6.30 eta 7.30 bitartean, elkartearen egoitzan, Berako Agerra auzoan. Federatuek 13 euro ordaindu beharko dituzte federazio-txartela aurkeztuta, eta 15 euro federatu gabeek. Irteera bertatik aterako da, 7:30tan.
Parte-hartzaile bakoitzak kartulina bat jasoko du irteerako kontrolean, eta Intzola, Larun eta Idoiako lepoko kontroletan eta elkartera iristean aurkeztu beharko du.
Ibilbidean zehar, lau hornidura puntu egingo dira janari eta edariarekin: Intzolan (9. km), Larunen (15. km), Idoiako lepoan (19. km/22. km) eta elkartean bukaeran.
Mendizaleak Agerra auzotik aterako dira lehen gailurrera joateko, Manttalera (5. km). Ibardinetik igaro ondoren, Intzolara joango dira (9. km), eta handik Iesolako Bentara igoko dira (11. km). Ibilaldiko puntu horretan, 26 kilometroko martxa Larunera joango da (15. km), gero Lizuniagara jaitsi (19. km) eta Idoiako Lepotik (22 km-ra), Larretagainera (Santa Barbara, 24 km). Azkenik, elkartean bukatuko da, Agerran, 26 kilometroko bira zirkularra osatuz.
Bestalde, ibilbide motza Iesolako bentatik Maletera jaitsiko da (16. km), hortik Idoiako Lepora eta Larretagainara joanez, eta 22 kilometroko ibilbidea Agerran bukatuz.
Berako Mendi Itzulia Nafarroako Mendi Kirol Federazioak antolatzen duen Ibilbide Luzeko Mendi Ibilaldien Nafarroako Zirkuituan dago. Orain arte Sakanako eta Etxalarko ibilaldiak egin dira eta hurrengo hitzorduak hauek izango dira: Hiru Mendi Zerrak (maiatzaren 13an), Berako Itzulia (maiatzaren 21ean), Baztango Mendi Ibilaldia (maiatzaren 28an), Aralarko Mendi Ibilaldia (ekainaren 11n), Aresoko Itzulia (irailaren 3an), Erronkariko Pirinio Garaiko Martxa (irailaren 23an) eta Irañetako Euskal Herriko Erdigunera ibilaldia (urriaren 1ean).
